மஹாபெரியவா, தெய்வத்தின் குரல் ஐந்தாம் பகுதியில், ஆதிசங்கரரின் சரித்ரத்தை, விஸ்தாரமாக 800 பக்கங்களில் ஆனந்தமாக பேசியிருக்கிறார்கள். இந்த இணையதளத்தில் சாய்ஸ்ரீநிவாசன், சௌம்யா மற்றும் நண்பர்கள், ஒவ்வொரு அத்தியாயத்தையும் எடுத்துக்கொண்டு, அதை ஒலிப்பதிவு செய்து, ஆங்கிலத்தில் மொழிபெயர்த்து, சிறந்த கற்பனை வளத்தோடு ஒரு சித்திரமும் வரைந்து, வாராவாரம் வெளியிட்டு வருகிறார்கள். அதை நீங்கள் அவசியம் பாருங்கள், கேளுங்கள்.

நான் மஹாபெரியவாளின் சங்கர சரிதத்தை என் குருநாதரிடம் பலமுறை படித்திருக்கிறேன். கோவிந்த தாமோதர ஸ்வாமிகள், ராமாயணத்தையும் பாகவதத்தையும் எத்தனை ஆசையாக கேட்பாரோ, அதே போல ஆசையோடு, இந்த சங்கர சரிதத்தை கேட்டு மகிழ்ந்து, இடையிடையில் மஹாபெரியவாளை பற்றி பல அனுபவங்களை பகிர்ந்து கொள்வார்கள். அதனால் இந்த சங்கர சரிதத்தை எல்லாருக்கும் சொல்ல வேண்டும் என்று எனக்கு ஒரு ஆவல்.

என்னுடைய மழலை மொழியில், எளிய தமிழில், இருபது நிமிஷங்கள் கொண்ட பதினாறு பாகங்களாக, ஸ்ரீ சங்கர சரிதத்தை சொல்லி இருக்கிறேன். அதில் முக்கியமாக ஆதி சங்கரர் அவதாரத்தோடு, மஹாபெரியவாளின் அவதாரத்தையும், ஆதிசங்கரர் ஸன்யாசம் வரும் போது, மஹாபெரியவாளின் ஸன்யாசத்தையும், ஆதிசங்கரரின் பாதையில் மஹாபெரியவா நடந்து காட்டியதையும் விரிவாகப் பேசியிருக்கிறேன். ஆதிசங்கரரின் பக்தி கிரந்தங்களை அதிகமாக மேற்கோளாக கொடுத்து இருக்கிறேன். குழந்தைகளும் ரசிக்க கூடிய, ஆதிசங்கரரின் வாழ்வில் நடந்த சுவையான சம்பவங்களை, விடாமல் கூறியிருக்கிறேன். இந்த மாதம் 28ஆம் தேதி (28th April 2020) ஸ்ரீசங்கர ஜயந்தி மஹோத்ஸவம் வருகிறது. சங்கர சரிதத்தை கேட்டு அவருடைய மஹிமையை மனதில் கொண்டாடுவோம்.

Categories: Upanyasam